Lyrics : K.V.S1 മേലിലുള്ളെരൂശലേമേ! കാലമെല്ലാം കഴിയുന്ന
നാളിലെന്നെ ചേര്ക്കണേ നിന് കൈകളില്-നാഥാ!
ലളിതകൃപയുടെ വരിഷമനുദിനമനുഭവി-
പ്പതിനരുളണേ സഭയാകുമീ പുഷ്പമാം സാധു നൈതലില്-നിന്റെ
പാലനമല്ലാതെയെന്തിപ്പൈതലില് ?
2 ഹാ! കലങ്ങള്ക്കിടയില് നീ ആകുലയായ് കിടന്നാലും
നാകനാഥന് കടാക്ഷിക്കും നിന്റെ മേല്-കാന്തന്
പ്രേമരസമതു ഭവിയുടെ മനമാശു തന്നിലൊഴിക്കവേ-പര
മാത്മചൈതന്യം ലഭിക്കുമാകയാല്-നീയും
വാനലോകേ പറന്നേറും പ്രാവുപോല്
3 ബാലസൂര്യകാന്തികോലും ചേലെഴും ചിറകിനാല് നീ
മേലുലകം കടക്കുന്ന കാഴ്ചയെ-പോരാ
കനകമണിവൊരുഗണിക സുതരൊടു സഹിതമാഴിയിലാണിടും തവ
ബാബിലോണ് ശിക്ഷയാം ഘോരവീഴ്ചയെ-കാണ്മാന്
ബാലനിവന്നേകണം നിന് വേഴ്ചയെ
4 ആയിരമായിരം കോടി വാനഗോളങ്ങളെ താണ്ടി
പ്പോയിടും നിന്മാര്ഗ്ഗമൂഹിക്കാവതോ?-കാണും
ഗഗനതലമതു മനുജഗണനയുമതിശയിച്ചുയരും വിധൌ-തവ
ഭാഗ്യമഹിമയെ വാഴ്ത്താനാവതോ? - സൗഖ്യം
ലേശമെങ്കിലുമുരപ്പാന് നാവിതോ?
5 വെണ്മയും ചുമപ്പു പച്ച മഞ്ഞ നീലം ധൂമ്രമെന്നീ
വര്ണ്ണഭേദങ്ങളാല് നിഴല് നല്കിയേ-ജ്യോതിര്
മണ്ഡലങ്ങളിലമരുമവരുടെ വന്ദനം ജയഘോഷമെന്നിവ
മണ്ഡനമായ് തന്നു നിനക്കംബികേ! -വാനം
നിന്നെയുപചരിച്ചിടും ധാര്മ്മികേ!
6 ഹാ! മണവറയ്ക്കടത്തു നീയണയും സമയത്തു
ശ്രീമഹാരാജ്ഞിയേ! നിന്നെക്കാണുവാന്- സ്വര്ഗ്ഗ
കാമിനീഗണമമിതകുതുകമൊടാദരാലരികേ വരും തവ
കൈകളെ കാന്തന് പിടിക്കും മോദവാന്-നിത്യ
സ്നേഹഭവനത്തിനുള്ളില് പൂകുവാന്
7 നിന്മുഖത്തുനിന്നു തൂകും നന്മധുപൂരത്തിലംബേ!
മുങ്ങി ലയിക്കുന്നു ദിവ്യജ്ഞാനികള്-നിന്റെ
നന്മൊഴിക്കരികണയുവതിനൊരു നവ്യമായ സയന്സുമില്ലതു
സമ്മതിക്കുന്നജ്ഞരല്ലാപ്രാണികള് -തെല്ലു
മുണ്മയറിയുന്നതില്ലേ മാനികള്
8 നിന് മഹിമയോതുവതിന്നിന്നരന്നു സാദ്ധ്യമല്ലേ
പൊന്നുപുതുവാനഭൂമി വന്നിടും-അതേ
മണ്ണില് വീണു മറഞ്ഞുപോയവര് പിന്നെയും പുതുതാമുടല് ധരി-
ച്ചുന്നതജീവനെയാണ്ടു നിന്നിടും-നാളില്
നിന്നിലടിയന് ലയിച്ചുചേര്ന്നിടും
9 സത്യമാതാവായെനിക്കിങ്ങുത്തമേ നീ മാത്രമല്ലോ
നിത്യനേശുക്രിസ്തുരാജനെന്നുമേ-സര്വ്വ
ദു:ഖവും നിജതൃക്കടാക്ഷമതൊന്നു കൊണ്ടകലത്തകറ്റിടു-
മുള്ക്കനിവേറും പിതാവാണിന്നുമേ-മമ
സ്വര്ഗ്ഗപിതാവിന്റെ നാമം ധന്യമേ-
Download pdf