1002. മന്നവനാം മശിഹായെ കാണാഞ്ഞി
മന്നവനാം മശിഹായെ കാണാഞ്ഞി-ട്ടെന്‍റെ
കണ്ണുകളും പാരമിതാ തളരുന്നു
1 ഭൂതലത്തെ സുവിശേഷനാദത്താല്‍-മോദ-
പൂരിതമാക്കിടേണ്ടവര്‍ നിലതെറ്റി
ഘോര രണസന്നദ്ധരായിടുന്നു ചിത്തില്‍
ഓരുവതുപോലുമാകാ ഗുണസിന്ധോ!-
2 ലോകനന്മയുളവാക്കും ശാസ്ത്രത്തെ-യിപ്പോള്‍
ലോകനശീകരണത്തിന്‍ യന്ത്രങ്ങള്‍
ആകൃതിപ്പെടുത്തുവാനായ് സര്‍വ്വേശാ! പാപ-
പൂരിതന്മാര്‍ തുനിയുന്നുപാര്‍ത്തായോ?-
3 യുദ്ധസന്നദ്ധരായയ്യോ! ക്രിസ്ത്യന്മാര്‍-ഘോര
യുദ്ധമതിനിറങ്ങുന്നു ദയനീയം, ബോംബുകളും ടാങ്കുകളും
ഭുവനത്തെ തീരെ ചാമ്പലാക്കിക്കളയുന്നു-പാര്‍ത്തോയോ?
4 ലോകനാഥാ! നിന്‍റെ ദിവ്യകാരുണ്യ-നേത്രം
ശോകസമുദ്വിഗ്നരായ ഞങ്ങള്‍ മേല്‍
നീ തിരിച്ചു ഭയങ്കര ബാധകളെ ഭൂവിന്‍
മീതില്‍നിന്നു നീക്കുക നീ വേഗത്തില്‍-
5 യാതൊരു നിമിഷവും നീ കളയാതെ മേഘ-
വാഹനത്തിലെഴുന്നള്ളി വിരവോടെ
താവകമാം ചിറകടി തന്നില്‍ നീ കാത്തു
പാലനമരുള്‍വാന്‍ ഭൂവില്‍ വന്നാലും-
6 യുദ്ധഭേരി നിനാദമല്ലടിയങ്ങള്‍-ക്കിനി-
യുത്തമമാം തിരുനാമ മധുരത്താല്‍ ചിത്തമതു കുളിര്‍ത്തിടാന്‍
അരുളേണം സാത്താനിദ്ധരയെ പിളര്‍ക്കുമിത്തരുണത്തില്‍-
7 അഗ്നിചൂര്‍ണ്ണമതിന്‍ ഗന്ധം ഗഗനത്തില്‍-നിന്നു
നിഷ്ക്രമിച്ചു പുഷ്പഗന്ധമതു നല്കും
കുന്ദകുസുമാദികളാല്‍ ചര്‍ച്ചിതവായു
മണ്ഡലമരുള്‍ക ഞങ്ങള്‍ക്കഖിലേശാ!-
Download pdf