930. ബാല്യകാലത്തിലെ നിന്‍-സൃഷ്ടാവിനെ
ബാല്യകാലത്തിലെ നിന്‍-സൃഷ്ടാവിനെ ഓര്‍ത്തുകൊള്‍കെന്‍ പ്രിയനേ!
ദുര്‍ദിവസങ്ങള്‍ നിനക്കണയാതെയും ഇഷ്ടമില്ലാക്കാലം വന്നു ചേരാതെയും
1 നല്ല വെളിച്ചമെങ്ങു-മകന്നു നീരുള്ള കാറിന്‍ നിരയാല്‍
എല്ലാടവുമിരുണ്ടു നഭസ്സിനാലല്ലിനു തുല്യമായി
നല്ലതാം യൗവനശോഭനിലച്ചുടന്‍
വല്ലാത്ത വാര്‍ദ്ധക്യമേന്തുകില്‍ ദുര്‍ഘടം
2 വീട്ടുകാവല്‍ക്കു നില്‍ക്കും-പ്രധാനികള്‍ ഞെട്ടിവിറയ്ക്കുമന്നു
മുട്ടെക്കുനിഞ്ഞുപോകു-മുടല്‍ ബലപ്പെട്ടവരെന്‍ പ്രിയനേ!
മുട്ടനും സാധുവും ഭേദമെന്തണ്‍പതില്‍
ഇട്ടിടത്തങ്ങു കിടന്നു വലഞ്ഞുപോം
3 മുപ്പതും രണ്ടുമുണ്ട്-യുവാവിനു മുത്തിനോടൊത്ത ദന്തം
നാല്‍പതാകും വയസ്സില്‍ കൊഴിഞ്ഞവ മിക്കതും തീര്‍ന്നുപോകും
ഡോക്ടര്‍ പറിച്ചതും പട്ടതും-നീക്കിയാല്‍
ശിഷ്ടമേതാനുമുണ്ടൊട്ടും ഫലം വരാ
4 ജാലകത്തിങ്കലൂടെ-നോക്കുന്നവരാകെയന്ധീഭവിക്കും
വീഥിയിന്‍ നേരെയുള്ള-കതകുകളാകെയടഞ്ഞുപോകും-
ഭക്ഷ്യമരയ്ക്കുന്ന ശബ്ദം കുറയുമേ
പക്ഷികള്‍ തന്‍ ശബ്ദത്തില്‍ വൃദ്ധനുണര്‍ന്നുപോം-
5 പാട്ടുകാരൊക്കെയയ്യോ-തളര്‍ന്നുപോം കേറ്റം ഭയപ്രദമാം
റോട്ടിലവിടവിടെ-ഭയത്തിനു ഹേതുവും സംഭവിക്കും
ബദാം മരം പൂത്തു ഭാരമായ് തീര്‍ന്നിടും
ദീപനം നാസ്തിയാം
6 മര്‍ത്ത്യനോ ഭൂമിവിട്ടു-തനിക്കുള്ള നിത്യഗൃഹത്തിലേക്കു
യാത്ര ചെയ്യുന്നുടനെ-മരണത്തിന്‍ വാര്‍ത്തയും കൊണ്ടനേകര്‍
ദു:ഖഗാനം പാടി വീഥിയിലൊക്കവെ
ചുറ്റിനടക്കുന്നു മറ്റെന്തു സാധ്യമാം-
7 വെള്ളിച്ചരടഴിയും-യഥാര്‍ത്ഥമായ് പൊന്നുങ്കിണ്ണം തകരും
ഊറ്റിലുടഞ്ഞുപോകും കുടം കിണറ്റില്‍ തകരുന്നു ചക്രം
മണ്ണുടന്‍ ഭൂമിയില്‍ ചേരുമാത്മാവതു
നല്‍കിയ നാഥന്‍റെ ചാരത്തു പോയിടും-
8 നല്ലതും തീയതുമാം- പ്രവൃത്തികള്‍ക്കുള്ള കണക്കവിടെ
തന്നുടെ ന്യായസഭ-യതില്‍ കൊടുത്തീടണം മര്‍ത്യനന്നു
നന്നാരഹസ്യമായുള്ള ക്രിയകളും
മന്നവന്‍ മുമ്പില്‍ വരാതെ പോകാ ദൃഢം
9 മായയെന്നോതിടുന്നു-സമസ്തവും മായതാനെന്തു ഭേദം
ന്യായബുദ്ധിയുറച്ചു-തകര്‍ക്കുക മായയിന്‍ ദര്‍ശനത്തെ
ജ്ഞാനസൂര്യനുദിച്ചാനന്ദ രശ്മിയെ
മാനസേ വീശണം മായ നീങ്ങാന്‍ സഖേ!
10 എല്ലാറ്റിനും ചുരുക്കം-ഉരച്ചിടാം വല്ലഭനെ ദിനവും
ഉള്ളില്‍ ഭയന്നു തന്‍റെ-നിദേശങ്ങളെല്ലാമനുസരിച്ചാല്‍
നല്ലതാം ലോകത്തിലല്ലലില്ലാതെ നാം
എല്ലായ്പ്പോഴും വാണു തന്നെ സ്തുതിച്ചിടാം
Download pdf