1222. പ്രഭാകരനുദിച്ചുതന്‍ പ്രഭ ചിന്തി
1 പ്രഭാകരനുദിച്ചുതന്‍ പ്രഭ ചിന്തി വിളങ്ങുമീ-
പ്രഭാതത്തില്‍ ദേവേശനെ സഭയായ് സ്തുതിക്ക നാം-
2 ഇരുള്‍ മാറി വെളിവിതാ ധരണിമേല്‍ തിളങ്ങുന്നു
മറവിനുള്ളടങ്ങിന പൊരുളുകള്‍ തെളിയുന്നു-
3 അതിതരാം ശ്രമം മൂലം മതി തളര്‍ന്നുറങ്ങിന
ക്ഷിതിതല നിവാസികള്‍ അതിസുഖമുണരുന്നു-
4 മരണതുല്യമാം നിദ്രാഭരമതിന്നധീനമാ-
യിരുന്നൊരു ജഗദാകെ പുതുജീവന്‍ ധരിക്കുന്നു-
5 വരിക നാമൊരുമിച്ചു പരന്നടിപണിഞ്ഞിടാം
തിരുഹിതമല്ലോ ഭൂവില്‍ പരിവര്‍ത്തിച്ചിടുന്നതു-
6 തിരുപ്പദമകാലത്തില്‍ തിരക്കുകിലലഭ്യമാം
മരിക്കിലുമിരിക്കിലും നമുക്കതു ശരണ്യമേ-
7 തിരുസ്വരമെഴുതിന കുറിപ്പുകള്‍ പഠിക്ക നാം
തിരുവചസ്സറിവില്ലാത്തരങ്ങളെ തുരത്തുന്നു-
8 ദുരിതത്തിന്‍ ഫലമായ മരണത്തെ തുലയ്ക്കുന്നു
കരയുന്ന ജനങ്ങള്‍ക്കു പുരുമോദമരുളുന്നു-
Download pdf