208. ദൈവത്തിന്‍ കൃപയെ ചിന്തിക്കാം
ദൈവത്തിന്‍ കൃപയെ ചിന്തിക്കാം
ദിവ്യജീവന്‍ നല്‍കിയതോര്‍ക്കാം
1 ഏകസുതനില്‍ വിശ്വസിച്ചിടുന്നോര്‍
ക്കേവര്‍ക്കും ജീവന്‍ നല്‍കുവാനവനെ
ഏകി ലോകത്തെ സ്നേഹിച്ച കൃപയെ
പുകഴ്ത്തി നമുക്കു സ്തുതിക്കാം-
2 ന്യായവിധിയിന്‍ വാളിന്നു കീഴില്‍
ന്യായമായകപ്പെട്ടാകുലരാകും
നമ്മുടെ ശിക്ഷയഖിലം പുത്രന്മേല്‍
ചുമത്തിയ കൃപയോര്‍ക്കാം-
3 ദൈവമേ! ദൈവമേ! ഈ വിധമെന്നെ
കൈവിട്ടതെന്തന്നലറിക്കരയുവാന്‍
ജീവന്‍റെ നാഥന്നിടയായതെന്തെ-
ന്നറിഞ്ഞു നമുക്കു സ്തുതിക്കാം-
4 കുരിശില്‍ തന്‍ജീവന്‍ വെടിഞ്ഞുവെന്നാലും
മരണത്തെവെന്നുതാനുയിര്‍ത്തു മൂന്നാം നാള്‍
പ്രാണന്നു പുതുക്കം പ്രാപിച്ചു നമുക്കും
പ്രണമിച്ചു മുന്നില്‍ വീഴാം-
5 നമുക്കായിട്ടിന്നും മല്‍ക്കിസദേക്കിന്‍
ക്രമത്തില്‍ പ്രധാന പുരോഹിതനായി
സ്വര്‍ഗ്ഗവിശുദ്ധസ്ഥലത്തെത്തി വാഴു-
ന്നവനെ നമുക്കു സ്തുതിക്കാം-
6 വീണ്ടും വരുന്നു രാജാധിരാജന്‍
കണ്ടിടും മേഘം തന്നില്‍ നാമവനെ
സ്വന്തജനത്തെ ചേര്‍ത്തിടുമുടനെ
ഹല്ലേലുയ്യാ ഗീതം തുടരാം-
Download pdf