231. ദൈവം നല്ലവന്‍ എന്നെന്നും നല്ലവന്‍
ദൈവം നല്ലവന്‍ എന്നെന്നും നല്ലവന്‍
ഞാന്‍ രുചിച്ചറിഞ്ഞു പാടും ദൈവം നല്ലവന്‍
1 അവങ്കലേക്കു നോക്കിയോര്‍ പ്രശോഭിതരായി
ആരും നിലനില്‍ക്കുകയില്ലവര്‍ക്കെതിരായി
ദൂതര്‍ ഭക്തര്‍ ചുറ്റും നില്‍ക്കും വന്‍മതിലായി
ദുഷ്ടര്‍ പോകും കാറ്റുപാറ്റിടും പതിരായി
2 വിണ്ഡലം ഭൂമണ്ഡലം നിര്‍മ്മിക്കും മുന്നേ
ഉണ്ടെനിക്കനാദിയായി ദൈവമായ് തന്നേ
തലമുറകള്‍ക്കാശ്രയമാം നല്ലവന്‍ നന്നേ
മറന്നിടാതെ കാത്തിടുന്നു നിത്യവും നമ്മെ-
3 കഷ്ടതകള്‍ ശോധനകള്‍ നേരിടുമ്പോഴും
ഇഷ്ടരായോര്‍ വിട്ടകന്ന് പോയിടുമ്പോഴും
നഷ്ടമല്ലതൊന്നും നിത്യ ദൈവസ്നേഹത്താല്‍
നന്മയ്ക്കെന്നു വ്യാപരിക്കും എനിക്കവയെല്ലാം-
4 എന്തുമെന്‍റെ ജീവിതത്തില്‍ സംഭവിച്ചാലും
എന്തിനെന്നകം കലങ്ങി ചോദിക്കില്ല ഞാന്‍
നൊന്തൊഴുകും കണ്ണുനീര്‍ തന്‍ പൊന്നു പാദത്തില്‍
ചിന്തി ഞാന്‍ തുടര്‍ന്നു പാടും ദൈവം നല്ലവന്‍-
Download pdf