247. ദേവ ദേവ നന്ദനന്‍ കുരി
ദേവ ദേവ നന്ദനന്‍ കുരിശെടുത്തു
പോവതു കാണ്മിന്‍ പ്രിയരേ
കാവിലുണ്ടായ ശാപം പോവാനിഹത്തില്‍ വന്നു
നോവേറ്റു തളര്‍ന്നയ്യോ! ചാവാനായ് ഗോല്‍ഗോത്തായില്‍
1 പരമപിതാവിനുടെ തിരുമാര്‍വിലിരുന്നവന്‍
പരമഗീതങ്ങള്‍ സദാ പരിചില്‍ കേട്ടിരുന്നവന്‍
പരമദ്രോഹികളാകും നരരില്‍ കരളലിഞ്ഞു
സര്‍വ്വമഹിമയും വിട്ടുര്‍വ്വിയിങ്കല്‍ വന്നയ്യോ-
2 കുറ്റമറ്റവന്‍ കനിവറ്റ പാതകനാലെ
ഒറ്റപ്പെട്ടു ദുഷ്ടരാല്‍ കെട്ടിവരിയപ്പെട്ടു
ദുഷ്ടകൈകളാലടിപ്പെട്ടുഴുത നിലംപോല്‍
കഷ്ടം! തിരുമേനിയോ മുറ്റുമുഴന്നുവാടി-
3 തിരുമുഖാംബുജമിതാ അടികളാല്‍ വാടിടുന്നു
തിരുമേനിയാകെ ചോര തുടുതുടയൊലിക്കുന്നു
അരികളിന്നരിശമോ കുറയുന്നില്ലല്‍പ്പവുമേ
കുരിശില്‍ തറയ്ക്കയെന്നു തെരുതെരെ വിളിക്കുന്നു-
4 കരുണതെല്ലുമില്ലാതെ അരികള്‍ ചുഴന്നുകൊണ്ടു
ശിരസ്സില്‍ മുള്‍മുടിവെച്ചു തിരുമുഖം തുപ്പി ഭാര
കുരിശങ്ങെടുപ്പിച്ചയ്യോ! കരകേറ്റിടുന്നിതാ കാല്‍
വരിമലയിങ്കല്‍ തന്നെ കുരിശിച്ചിടുവാനായി-
5 കുറ്റമറ്റവന്‍ പാപ-പ്പെട്ടവന്‍ പോല്‍ പോകുന്നു
ദുഷ്ടര്‍ കൂട്ടം ചുഴന്നു ഏറ്റം പങ്കം ചെയ്യുന്നു
പെറ്റമാതാവങ്ങയ്യോ! പൊട്ടിക്കരഞ്ഞിടുന്നു
ഉറ്റനാരിമാര്‍ കൂട്ടമെത്രയുമലറുന്നു-
6 എത്രയും കനിവുള്ള കര്‍ത്താവേ! ഭര്‍ത്താവേ! ഈ
ചത്തചെള്ളാം പാപിമേലെത്ര സ്നേഹം നിനക്കു
കര്‍ത്താവേ, നീ നിന്‍റെ രാജ്യത്തില്‍ വരുമ്പോളീ-
ഭൃത്യനെയും കൂടെയങ്ങോര്‍ത്തുകൊണ്ടിടണമേ-
Download pdf