1100. ഇരവിന്നിരുള്‍ നിര തീരാറായ്
ഇരവിന്നിരുള്‍ നിര തീരാറായ് പകലിന്‍ കതിരൊളി കാണാറായ്
പുതിയൊരു യുഗത്തിന്‍ പുലരിവരും
നീതിയിന്‍ കതിരോനൊളി വിതറും
അധിപതി യേശു വന്നിടും അതുമതിയാധികള്‍ തീര്‍ന്നിടും
1 ഉണരിന്‍ ഉണരിന്‍ സോദരരേ! ഉറങ്ങാനുള്ളോരു നേരമിതോ?
ഉയിര്‍തന്നോനായ് ജീവിപ്പാന്‍ ഉണ്ടോ വേറൊരു നേരമിനി?
2 തരിശു നിലത്തെയുഴാനായി തിരുവചനത്തെ വിതയ്ക്കാനായ്
ദരിശനമുള്ളവരെഴുന്നേല്‍പ്പിന്‍ കുരിശിന്‍ നിന്ദ വഹിക്കാനായ്
3 ഇന്നു കരഞ്ഞു വിതയ്ക്കുന്നു പിന്നവരാര്‍പ്പോടു കൊയ്യുന്നു
ഇന്നു വിതയ്ക്കാ മടിയന്മാരന്നു കരഞ്ഞാല്‍ ഗതിയെന്ത്?
4 കത്തിത്തീര്‍ന്നൊരു കൈത്തിരിപോല്‍
പൂത്തുപൊഴിഞ്ഞൊരു പൂവെപ്പോല്‍-
എത്തിത്തിരികെ വരാതെ പോം കര്‍ത്തവ്യത്തിന്‍ നാഴികകള്‍-
5 സ്നേഹം നമ്മുടെയടയാളം ത്യാഗം നമ്മുടെ കൈമുതലാം
ഐക്യം നമ്മുടെ നല്ല ബലം വിജയം നമ്മുടെയന്ത്യഫലം-
6 തീയില്‍ നമ്മുടെ വേലകളെ ശോധനചെയ്യും വേള വരും
മരം പുല്ലു വയ്ക്കോല്‍ ഇവ വെന്തുപോയാല്‍ ബാക്കിവരും എന്ത്?
7 ഇന്നിഹ നിന്ദിതര്‍ ഭക്തഗണം അന്നു നടത്തും ഭൂഭരണം
കേഴും ഖിന്നത തീര്‍ന്നവരായ് വാഴും നമ്മള്‍ മന്നവരായ്-
Download pdf