733. ഇതുവരെയെന്നെ കരുതിയ നാഥാ
ഇതുവരെയെന്നെ കരുതിയ നാഥാ!
ഇനിയെനിക്കെന്നും തവ കൃപ മതിയാം
1 ഗുരുവരനാം നീ കരുതുകില്‍ പിന്നെ
കുറവൊരു ചെറുതും വരികില്ല പരനേ!
അരികളിന്‍ നടുവില്‍ വിരുന്നൊരുക്കും നീ
പരിമളതൈലം പകരുമെന്‍ ശിരസ്സില്‍
2 പരിചിതര്‍ പലരും പരിഹസിച്ചെന്നാല്‍
പരിചില്‍ നീ കൃപയാല്‍ പരിചരിച്ചെന്നെ
തിരുച്ചിറകടിയില്‍ മറച്ചിരുള്‍ തീരും
വരെയെനിക്കരുളുമരുമയൊടഭയം-
3 കരുണയിന്‍ കരത്തിന്‍ കരുതലില്ലാത്ത
ഒരു നിമിഷവുമീ മരുവിലില്ലെനിക്കു
ഇരവിലെന്നൊളിയായ് പകലിലെന്‍ തണലായ്
ഒരു പൊഴുതും നീ പിരിയുകയില്ല-
4 മരണത്തിന്‍ നിഴല്‍ താഴ്വരയതിലും ഞാന്‍
ശരണമറ്റവനായ് പരിതപിക്കാതെ
വരുമെനിക്കരികില്‍ വഴിപതറാതെ
കരം പിടിച്ചെന്നെ നടത്തിടുവാന്‍ നീ-
5 തല ചരിച്ചിടുവാന്‍ സ്ഥലമൊരു ലവമീ-
യുലകിതിലില്ല മനുജകുമാരാ
തല ചരിക്കും ഞാന്‍ തവ തിരുമാറില്‍
നലമൊടു ലയിക്കും തവ മുഖപ്രഭയില്‍- M.E.C
Download pdf