Lyrics : K.V.Sസങ്കീര്ത്തനം 45
എന്മനസ്സുയരുന്നഹോ! നന്മയേറും വചനത്താല്
ചിന്മയരാജനെക്കുറിച്ചു-പാടിയ കഥ ചെമ്മയോടറിയിച്ചിടുന്നു
1 ലേഖകന്റെ വേഗമേറും ലേഖനി താനെന്റെ ജിഹ്വ
ലോകപാലക! നീയെത്രയും നരസുതരിലാകവേ സുന്ദരനാകുന്നു-
2 നിന്നധരങ്ങളില് കൃപമന്നനേ സംക്രമിക്കുന്നു
ഉന്നതനാം ദേവനതിനാല് നിന്നെയങ്ങഹോ! എന്നുമാശീര്വ്വദിച്ചിടുന്നു-
3 ശൂരനേ! നിന്വാളരയ്ക്കു വീര്യമഹിമയോടൊത്തു
ചാരുതരമായ് ബന്ധിച്ചിട്ടു നീതി സൗമ്യത നേരിവയാല് മഹത്ത്വത്തോടു
4 വാഹനമേറുക തവ വാമേതരമായ ബാഹു
ഭീമസംഗതികള് നിനക്കു പറഞ്ഞുതരും ആഹവ വിഷയമായഹോ!-
5 വൈരികളിന് ഹൃത്തടത്തില് പാരമാം മൂര്ച്ചയുള്ള നിന്
ക്രൂരശരങ്ങള് തറച്ചിടും ശത്രുഗണങ്ങള് വീണടിപെടും നിന്സന്നിധൗ-
6 നിന്നുടെ സിംഹാസനമോ എന്നുമുള്ളതത്രേ ചെങ്കോല്
മന്നവ, നേരുള്ളതാണഹോ! നീതിയെഴും നീ ദുര്ന്നയത്തെ സഹിക്കാ ദൃഢം
7 തന്നിമിത്തം തവ നാഥന് നിന്നുടെ കൂട്ടുകാരേക്കാള്
നിന്നെയാനന്ദ തൈലംകൊണ്ട് അധികമായി നന്ദിയോടു ചെയ്തഭിഷേകം-
8 ദന്തീദന്തംകൊണ്ടുള്ളതാം ചന്തമാം രാജധാനിയില്
സ്വാന്തമോദം വരുത്തുന്നല്ലൊ നിനക്കനിശം കമ്പിവാദ്യങ്ങളിന് നിസ്വനം-
9 നിന്നുടെ കഞ്ചുകമാകെ മന്നനെ മൂറും ലവംഗം
ചന്ദനമിവയാല് നല്ലൊരു മണം പരത്തി മന്ദിരം സുഗന്ധമാക്കുന്നു-
10 ആമോദമാനസനാമെന് ശ്രീമഹീപാലകമണേ!
രാജകുമാരികള് നിന്നുടെ സുമുഖികളാം വാമമാര് നടുവിലുണ്ടഹോ!-
11 നിന്നുടെ വലത്തോഫീറിന് പൊന്നണിഞ്ഞും കൊണ്ടു രാജ്ഞി
നിന്നിടുന്നല്ലയോ സാധ്വീ! നീ നോക്കുകെന്മൊഴി-
ക്കിന്നു ചായിക്ക നിന് കാതുകള്-
12 താതഗൃഹം സ്വജനമിത്യാദികള് സ്മരിക്ക വേണ്ടാ
പ്രീതനാകും നിന്നഴകിനാല് രാജനപ്പോഴേ നീയവനെ നമിച്ചിടുക-
13 തീറുവിന് ജനങ്ങളന്നു സാരമാം കാഴ്ചകളോടു
കൂടവേ വരും സവിധേ നിന്മുഖശോഭ തേടുമക്കുബേര പൂജിതര്-
14 അന്ത:പുരത്തിലെ രാജ്ഞി ചന്തമെഴും ശോഭമൂലം
എന്തു പരിപൂര്ണ്ണയാം അവളണിയും വസ്ത്രം പൊന്കസവുകൊണ്ടു ചെയ്തതാം-
15 രാജസന്നിധിയിലവള് തോഴിമാരോടൊന്നു ചേര്ന്നു
രാജകീയ വസ്ത്രമേന്തിയേ കൊണ്ടു വരപ്പെട്ടിടുമന്നാ വേളിനാളതില്-
16 സന്തോഷോല്ലാസങ്ങളോടു ദന്തനിര്മ്മിതമാം രാജ-
മന്ദിരത്തില് കടക്കുമന്നാള് അളവില്ലാത്ത ബന്ധുജനയുക്തയാമവള്-
17 നിന്റെ മക്കള് നിന്പിതാക്കള്ക്കുള്ള പദവിയിലെത്തി
ആയവര്ക്കു പകരം വാഴും സര്വ്വഭൂമിയില് നീയവരെ പ്രഭുക്കളാക്കും-
18 എല്ലാത്തലമുറകളും നിന്നുടെ നാമത്തെയോര്ക്കും-
വണ്ണമാക്കും ഞാനതുമൂലം ജാതികള് ധന്യേ
എന്നുമെന്നും നിന്നെ സ്തുതിക്കും-
19 ഉന്നതസ്ഥിതനാം സ്വര്ഗ്ഗമന്നവന്നും തന്സുതന്നും
എന്നുമുള്ളാവിക്കും മംഗളം ആദിമുതല്ക്ക് ഇന്നുമെന്നും ഭവിച്ചിടട്ടെ
![](images/PDF.gif)
Download pdf