840. ആരുണ്ടൊരാശ്രയമരുളുവാന്‍ നമ്മള്‍
രീതി: പരമപിതാവിനെ പാടി
1 ആരുണ്ടൊരാശ്രയമരുളുവാന്‍ നമ്മള്‍-
ക്കാരുണ്ടൊരാശ്വാസം നല്‍കുവതിന്നായ്
ആശ്രിതര്‍ക്കഭയമരുളുന്ന നല്ലോ-
രാശ്വാസദായകനാമേശുവുണ്ട്
2 പാപഭാരം പേറും മര്‍ത്ത്യനെത്തേടി
പാരിതില്‍ മര്‍ത്ത്യാവതാരമെടുത്തു
പാപികളാം മാനുഷര്‍ തന്‍പാപം പേറി
പരനേശു ക്രൂശില്‍ മരിച്ചുയിര്‍ പൂണ്ടു-
3 തന്‍ ബലി മരണത്താല്‍ രക്ഷ പ്രാപിച്ച
തന്‍ പ്രിയ മക്കളെ ചേര്‍ക്കുവാനായി
വീണ്ടും വരാമെന്നുര ചെയ്തുപോയ
വല്ലഭനേശു വന്നെത്തിടും വേഗം
4 വാനവനേശു നമുക്കായൊരുക്കും
ആ നല്ല വീട്ടില്‍ ചെന്നെത്തിടും നമ്മള്‍
ആ നല്ല സന്ദര്‍ഭമോര്‍ത്തിന്നു മോദാല്‍
ആനന്ദഗാനങ്ങള്‍ പാടി സ്തുതിക്കാം-
Download pdf